JANJIKU

Yen ada angin midid saka lumahing segara

lan ombak-ombak gumulung ngranggeh pesisir

aku eling marang bumiku kinasih

nanging uga eling marang pribadiku 

sing isih ringkih

banjur apa sing bisa dak pisungsungake

marang bumiku Indonesia kang dak tresnani

Oh, saupama aku bisa

aku kepingin atur pisungsung lan lelabuhan

kanggo bumiku, bangsaku lan negaraku

nanging iki dina

pangerten, kabisan & pengalamanku isih cupet

aku isih kudu sinau

nggegilut sawernaning ngelmu

kanggo sangu leladi ing tembe mburi

Jroning ati aku janji

marang Gusti lan Ibu Pertiwi

marang gurunadi lan yayah wibi

ing mbesuk lamun wis tumeka wanci

aku saguh cancut gumregut

urun udhu pikir rasa bandha wektu lan bau suku

kanggo kiprah ing madyaning pembangunan
tumuju Indonesiaku sing adil lan makmur
nadyan kapeksane aku kudu korban jiwa raga
bebasan ragaku putung binalangna
lan ajur sinawurna
aku rila,
sauger kanggo aruming nusa lan bangsa